香港人最實際，有着數自然開心，可惜凡事都有例外，施政報告推出免入息審查嘅公共交通費用補貼計劃，市民每月最多獲三百蚊回贈，滿以為皆大歡喜，點知未推出就惹嚟濫用同埋「雨露不均」嘅爭議，搞到爭拗多多，簡直吹脹！
其實用膝頭哥諗吓都諗到啦，邊啲人可以盡享交通費補貼吖，咪就係嗰班穿梭中港兩地嘅水貨客囉。有立法會議員計過數，以上水至羅湖八達通來回收費五十蚊計算，水貨客一日走五轉，每月返二十日工，一個月交通費高達五千大元，分開用三張八達通卡，每月可賺取高達九百蚊。以現時本港約有二千名水貨客計算，政府每年要花一千五百萬元公帑招呼呢班友。水貨客係本港居民都算數嘞，如果係內地人，豈不是同紓緩市民交通開支壓力背道而馳？
咁到底有冇辦法堵塞漏洞呢？議員建議可以規定跨境車程只接受個人八達通卡，如果市民持有多張個人八達通卡，只可以有一張卡獲得補貼。咁做係就係解決到部分問題，之但係你有張良計，佢有過牆梯，萬一有內地水貨客借用人哋個人八達通，港鐵又可以check得幾多，到時盞又添煩添亂嘅咋。
仲有就係邊啲交通工具納入補貼範圍嘅問題。繼之前邨巴同紅色小巴不滿被拒之門外，家陣又輪到校巴要求一視同仁，再咁落去，爭拗只會沒完沒了。面對群情洶湧，運房局局長陳帆又係大耍官腔，一方面重申邨巴等收費唔受政府監管，另一方面又話會繼續聆聽市民聲音，講咗等於冇講。
最好笑嘅係，政府將呢個交津計劃吹到天上有地下無，其中一個主要賣點就係毋須審查，簡單易行，結果家陣爭議四起唔在講，實行時間表亦係蝸行牛步，官方目標係三個月內訂出最終方案，之後再向財委會申請撥款，並喺一年內盡快落實計劃，唔好忘記，呢個只係順風順水嘅樂觀估計，以港產官僚嘅辦事效率，拖得幾拖，等到呢幾舊水真係落喺市民袋，蚊都瞓蛇都死。
退一步講，即使解決晒上述技術問題，亦唔代表可以平息紛爭。有學者就指出，基層家庭方面交通開支金額較低，但所佔比例往往更大，結果獲得嘅補貼反而少過高收入家庭一大截，情況就好似差餉減免，愈有錢愈受惠，係典型嘅資源錯配。港產官僚開口埋口公帑要幫助最有需要嘅市民，連搞全民退保都以此做擋箭牌，又難怪畀人質疑嘅。
所以話啫，好多嘢一試便知龍與鳳，連交津咁小嘅事都搞到一鑊粥，仲話「好打得」喎，「好打有限」咋啩！