綜援老屈風波下議員繼續反擊，勞福局副局長徐英偉慘淪箭靶。(設計圖片)
近日政府宣布收緊長者綜援申請門檻，申請長者綜援合資格年齡由現時60歲提升至65歲，民主派同建制派都鬧爆。本周四(10日)立法會舉行特首答問大會，特首林鄭月娥會上就話提高長者綜援申領資格係「議員批准」，一眾議員隨即炮轟林鄭「老屈」。今日(11日)立法會財務委員會開會，議員繼續反擊，連建制派都揶揄政府「魔鬼在細節」、「擺議員上枱」，出席會議嘅勞工及福利局副局長徐英偉(Caspar)淪為箭靶，搞到一個開位建議都拖足3個鐘頭先獲通過。
今日財委會審議勞工處開設首席勞工事務主任常額職位嘅建議，該職位負責取消強積金對沖機制事宜。該職位原本就同長者綜援措施冇乜關係，但多名建制派議員就乘機寸爆政府。其中率先開火嘅批發及零售界議員邵家輝話，依家逾八成商界都唔明白取消強積金對沖嘅新方案，當局根本冇向商界詳細解釋方案，鬧爆當局依家方案都未定，就已經急住開位。
而勞工界議員何啟明亦都揶揄政府，佢發言時就話「魔鬼在細節」，擔心如果有啲政策唔清楚，又冇人親身做游說工作，一旦落實就會出問題。而紡織及製衣界議員鍾國斌就索性提出中止待續議案，叫政府返去諗清楚先，不過議案就喺7票贊成、35票反對、4票棄權下否決。
不過，咪以為咁就完結，建築、測量、都市規劃及園境界議員謝偉銓(Tony)跟住接力，佢唔單止寸爆政府「信心爆棚」，喺取消強積金對沖方案未通過情況下就申請常額職位，反問政府係咪打算「擺議員上枱」，一旦通過開位建議，就等同支持取消強積金對沖方案。Tony仲提出臨時動議，要求將呢個常額職位變成編外職位，並喺18票贊成、15票反對下獲通過。
建制派都阻撓政府實屬罕見，不過Caspar都冇撤回開位建議，將有關職位改為編外職位，喺受靶3個鐘後，開位建議最終都以35票贊成、5票反對、2票棄權下獲通過。而財委會今日亦已通過涉款近10.5億港元嘅屯門西社區健康中心暨安老院舍工程撥款申請。
