【明報專訊】立法會議員謝偉俊（Paul）早前出橫額話「特首要變」，引來唔少人注意，但橫額好快「下咗架」，噚日阿Paul喺facebook話「要向政府施壓，研究全民退保」，要求「廢除MPF止蝕先」（圖）。佢話強積金15年嚟基金收費已近1000億元，覺得應該先廢除強積金，可以向政府施壓盡快落實全民退保。建制派支持全民退保都算罕見，公民黨譚文豪見到當然好快手cap圖做證，但原來阿Paul個post好快就刪咗，搞到譚文豪話「唔知謝偉俊議員係咪收到咩風？？個全民退保post出左一個鐘之後就『被消失』」。
否認收到風 話聽日質詢後再出
譚文豪喺fb話好歡迎阿Paul公開支持全民退保，畢竟對方2012年時曾就此議案投棄權票；而阿Paul竟然喺譚文豪fb留言解釋自己刪post係因為「諗住改吓，星期三質詢後再Post」。或者見到網民咁熱烈討論，阿Paul更加拍咗條片擺上網回應譚文豪，佢話無收到任何風，但反對強積金呢個post就一定會出，係義無反顧；阿Paul反而話公民黨係支持強積金，佢反問對方係咪即使強積金每年都蝕錢，公民黨都繼續支持呢？阿Paul又話，無論點都好，多啲交流係好事。